論如何令細路專心
搵人補習點都會有年紀比較細，心智未成熟嘅學生。佢地成日懷住“唔想做功課”、“想快D有得玩”嘅心態，上堂嘅時候郁來郁去，心思飛到雲霄之外，不留一點係課堂度。
今次呢位學生好鍾意飛機，甚至自己上網搵如何用紙做滑翔機。不得不說，飛機嘅結構十分完美。我從未想過脆弱柔軟嘅紙張可以砌到如此穩固；反而功課就唔識做，即使係個位數四則運算都可以頻頻計錯。
我試過用零食引誘，雖然食得好開心，但只係將focus從飛機擺係食物度；再用數學遊戲代替沉悶嘅教學，稍微將重心擺落教學度；再試下循序漸進返去正常教學，佢就返去玩飛機了。
點先可以將佢嘅Attention拉返落學習度？我已經開始覺得厭惡。每當做緊練習嘅時候喝住個學生坐底，卻又無可奈何地容許佢耍小脾氣。我要做嘅係竭盡所能去拉高佢成績，定係比我自己喘息，隻眼開隻眼閉，比返個放鬆嘅補習環境比佢？
我開始嘗試了解一下佢。佢其實識得好多嘢，例如唸住讀物理，自己都有睇Aerodynamics空氣動力學嘅原理，而且知道好多冷知識咁。我並不排除以上嘅嘢係睇Youtube Shorts或者IG Reels睇返嚟，但係呢D嘢的確勾起咗佢嘅興趣。
“你知唔知Physics同數學有好大程度嘅關係？”我問佢。
“知吖，”佢答，“所以要讀好數學！中文就算啦。”
從嗰堂課開始，這位學生嘅學習態度雖然無翻天覆地嘅變化，但係佢對數學嘅興趣顯著增加，分心嘅情況也有所減少。
佢仍然會在課堂上唸起心愛嘅飛機，但依家佢會嘗試將呢D唸法同數學問題聯繫起來。例如學緊速度同時間嘅關係，佢會問：“如果一架飛機飛得特別快，咁佢點計要幾多時間到達呢？”佢已經開始嘗試將佢嘅興趣融入到學習中。
佢仍然需要不時嘅提醒同鼓勵，但至少佢不再係個位上堂心不在焉嘅學生了。
