補習係嚟補心態的
做私補係大學生恩物。時間彈性之餘，時薪都比起求其搵餐廳兼職做比得高。且更重要嘅係，用腦工作比起勞動實在太輕鬆。但係點留住學生，Keep到個補習關係先係搵錢重點。
就好似我嘅一位學生，第二堂好似係因為無同阿媽傾好時間，上完棋藝班無縫連接數學補習，同阿媽好激動咁電話溝通。佢地傾完之後，喊住口咁。正常嚟講應該就唔會認真上堂住，所以我決定同佢吹下水先。平復學生情緒係好重要的，唔係嘅話邊有後話？
~Therapy Time~
“點解咁唔開心啊？唔鍾意見到我咩？”我半開玩笑咁問。
“今日好忙，原本唸住完上完最尾一堂可以抖下，點知你嚟咗。”佢聽起來真係好唔開心。
呢堂唔會認真教，但我叫佢一路做住學校練習一路傾計，從速成DSE必勝法，再傾到大學生活咁，原本憂鬱嘅眼神逐漸放光。
“放鬆D，初中嘅成績唔好好短暫嘅，我當時都係咁。”我比咗支強心針佢。“我都係中六先發力追返嚟。讀書搵到方法，上堂聽書就已經好足夠。”
事後個補習都係取消咗，原因係時間安排方面嘅問題。但我並不在意或可惜，因為補習從來不單只補知識，而係補心態，補氣氛，補放鬆嘅心情。真心去關心學生，有時候更勝於固執於無聊嘅學術進度。我深信教學之間，信任與關心比硬性知識更為根本。喺呢個快速變化嘅時代，學生面對嘅壓力愈來愈大，有時，一句鼓勵嘅語言、一次真誠嘅交流，對學生嚟講，遠比教學更有價值。雖然只係唯一一次嘅Deep talk，但希望我分享嘅事可以、即使少少都好、Open his mind。
