四月九號就開始考DSE，距離唔夠兩個月，大家溫晒書未？相信有啲人已經操晒past paper，但有啲人完全未開始，進度不一，下面小編會教大家點樣好好利用study leave，更加有效率咁溫書。
Table of Contents
1，整Timetable
一日之計在於晨
Study leave期間最好有一個Timetable可以管理住自己做嘢。而呢個Timetable最好由朝早開始，而唔係瞓到晏晝先開始溫書。
好多人會習慣夜晚通頂溫書，上堂/溫書嘅時候瞓覺補眠，忽略咗早起身嘅重要性。其實有研究指出朝早溫書更加容易記入腦。所以朝早比較適合需要背嘢嘅科目，例如生物、化學、中文等。
調節生理時鐘
早起身可以令你盡早適應DSE考試時間。用一個月調節生理時鐘，可以令你喺考朝早嘅科目嘅時候更加精神，唔會昏昏沉沉。
搵到適合自己嘅Timetable
同埋記得記得，Timetable要根據自己習慣而定，切記盲目跟隨其他人。有啲人會選擇一日溫一科，但小編覺得唔同時間溫唔同科目比較有效，而且適合一啲好難集中精神嘅人。好似朝早背嘢，午餐同晚餐之間可以溫兩至三科。晚餐前嘅一課，最好係自己鍾意嘅科目可以令自己更加有動力。最後臨瞓前，可以溫一concept或雞精。有助睡眠之餘，亦都冇咁chur。最重要嘅係，要控制好休息時間，跟足timetable做。捱到一個月就可以玩啦！！
2，如何善用雞精
點用雞精好？
好多人睇雞精會習慣用highlight pen記錄重點，但其實呢個行為係本末倒置。好嘅雞精本身已經全部重點，唔需要再自己挑選重點。如果真係有需要，可以跟住本雞精寫notes。唔需要整整齊齊乾乾淨淨，自己睇得明就可以。
幾時先用到？
雞精，Notes好多時候係比自己go through 一次重點，翻睇嘅時候好有可能已經係喺考場外面。而且notes記住預留空間，可以將啲奇怪題型或者自己容易唔記得嘅points抄返落去。
如果可以好好利用雞精，可以節省好多睇書嘅時可以節省好多睇教科書嘅時間。
3，操past paper+整錯題簿
錯題簿好重要
未開始操past paper嘅，記住準備一本錯題簿。切記自己抄題目同答案，真係會嘥好多時間。可以直接將補習社功課或者將DSE past paper印出嚟，或者善用科技，好好利用電腦、Tablet記錄，記住印埋答案，操晒啲past paper再做多次，做到自己冇錯為止。
唔好僥倖！
如果諗住僥倖心態，覺得自己記得錯過啲咩，咁就大錯特錯啦。去到study leave後期，你會畀唔同科目同埋題目洗禮，好早期嘅錯題就會唔記得。唔整錯題簿就等同於白費時間操卷，令自己喺考試痛失良機，唔好喺考試嘅時候再遇返先後悔。
注意題目Pattern
同學一路做past paper一路溫書嘅時候會發現某啲題型會一路出現，只係換咗數字，但其實計法一樣。例如數學頭幾條題目形式都差唔多，基本上做多幾次就可以掌握得到技巧。
