「一定有人同你講過讀書要努力，但係無人同你講……」

 

「一定有人同你講過讀書要努力，但係無人同你講……」

由細到大，一定有好多人同你講過「讀書一定要努力」。返學老師同你講「上堂要努力」，返到屋企阿爸阿媽見到你份試卷同你講「你溫書努力啦！」，半夜凌晨你發現仲有好多功課沒做，又唔懂得做，你同自己講「努力啦！」。

但係無人同你講過，讀書係靠聰明。愛因斯坦好努力，但如果佢無本身優越思維，佢努力都難以達到生前成就高度。

睇到呢度，你係咪覺得好灰？

「嚇，咁我唔聰明即係努力都無用？」

「咁即係天生我材唔一定有用啦？」

「唉，讀書呢條路無我份。」

閘住，我所提及嘅「聰明」唔係講緊，你有幾天才，三歲背唐詩三百首，五歲抬頭，七歲度三維數學。

所謂讀書要靠「聰明」講緊係，你有幾懂得轉換思維。

我教同學數學，一開始接觸新生，佢地都有一個普遍問題：

佢地上堂專心，但聽唔明白老師講咩。

佢地返屋企係咁做數，但係10題錯8題，剩下兩題唔識做。

佢地係屋企做數至少7成正確，考試就得2-3成。

然後佢地每次遇到以上問題就會覺得：

我努力專心聽，就會聽得明。

我再做多d，人地都話數學要操練，努力做多d就得。

我係屋企要努力做多d，考試就會熟手啦。

以上嘅同學，好多時候就係大家班裡面，個一位「明明好努力，但成績好一般。」嘅乖同學啦。

但如果你今日係用「聰明」讀書。情況會係咁：

1）上堂聽唔明老師

-明知學校老師講書好快，會唔會選擇上堂前睇個預習。

-老師教法可能唔適合你，所以你決定不如自己睇教科書，放學睇youtube學。

-好多數學term都無概念，咩係「function」「tangent」「sine graph」。

2）做數係咁錯

-如果你係不斷地出錯，其實你需要嘅唔係繼續做，係重新睇清楚個chapter。由公式，prove，example。全部再第一次。

-你對於某類型數，已經有一個錯誤嘅慣性思維，所以「你永遠錯負號」「你永遠唔記得加二次方」。

-請教數學好嘅同學，唔係問佢點做，而係問點解佢會用呢個方法去做，學習佢地嘅思維。

3）屋企就天才，考試就蠢材

-你可以培養一個習慣，遇到某類型數有特別記號，等自己考試可以用迅速時間去record翻。

 對於呢點，我有個有趣經歷關於我其中一位學生。

呢位學生佢每次mock都會錯remainder theorem之後搵root題目（Paper 1 A2），但係佢平時又上堂又識做喔。於是佢解決辦法係，直接背一題example。然後每次考試見到同樣題型，佢一定要係草稿紙默寫一次個example出來，然後考試照住個次序寫。

好奇怪又浪費時間嘅一個作法，但係又比佢真係解決佢經常錯同樣題型呢個問題。

講住咁多先。

下次有靈感再分享。最後都要講多句，我地係有提供數學補習，主要都係想教識同學做數思維，唔希望麻木操數，已確保無論題型有咩變化，同學都可以處理到。