就要選科，又或者係已經選咗科嘅各位，你是否仲未知各科需要嘅能力？選科涉及嘅不單係個人興趣同DSE嘅分數，更影響未來數年，乃至大學嘅發展方向，所以既然要揀，就要揀最啱自己長處同喜好嘅科目。但係各科唔同，點知揀咩好？今日帶埋詳盡圖表，比你地有基本嘅概念，揀到最發揮到自己優勢嘅科目！
目錄
主科：能力參考
中文
中文作為死亡之卷，最需要嘅就係背曬咁多篇範文同埋識得用比較公式化嘅答題技巧。唸下點將文章內容fit落答題框架度係得分重點。要理解到課文外嘅文章或者係文言文，些許天份都可以話係多多益善，平時多睇書或者對中文有唔少興趣嘅同學都可以嘗試下係中文科度脫穎而出。練習對中文嚟講性價比都高，練得多就越清楚DSE會如何出題，或者係如何答問題最拿到分。
英文
英文始終係非母語嘅語言，對一部分嘅考生可能比較吃力。平時睇多D國外嘅英文影集或者少少涉獵下課外書都可以對英文文法、詞彙有更多了解同應用。英文係無課文要背，但係需要記唔少嘅Vocab、Idiom，同Sentence pattern，呢D都係作文或者Oral嘅時候幫你大大加分嘅要點。練習對英文而言十分重要，如果可以係日常生活中同人用英文溝通，例如Send message用正統英文取代“火星文”，相信可以大大提升英文能力。
數學/數學延伸部分 (M1, M2)
數學係保底唔難但拿星難，更何況延伸部分都要唔少天份先可以簡單地處理到微積分。平時可以睇Youtube有關數學嘅片，釐清深奧嘅數學概念絕對係考評局最希望考生做到嘅嘢。識得用計算機程式都可以幫你喺考試嘅時候將精力留比Part B最後幾題，不浪費在Part A1嘅簡單問題度。識得將題目拆為簡單嘅Component都可以減少做卷時間，比你良好嘅時間安排去做多分嘅題目。
公社科
LS就取消咗，取而代之嘅就係CS。睇過兩眼，發現其實要合格並不需要投放幾多精力，只需要識得用答題框架回答，並正常地舉例得分即可。需要記各個Topic有咩Point可以寫，再唸下點Fit落題目度就可以安全合格。由於並無CS嘅往年考生表現參考，我就參考返LS嘅Level 2嘅考生表現，你會發現只要有邏輯地作答，言之成理，夠貼題，就足以得到合格嘅分數。如果你自認可以寫得出同佢差唔多，甚至更好嘅Point，合格就已經穩操勝券。
睇下其他Level 1-2考生點答–>考評局考生表現示例，引以為鑑就穩定合格！
理科
物理
物理同數學差唔多，都係一理通，百理明嘅Type。只要係生活中留意各種物理現象，就可以幫你係考試個陣Check到答案合唔合理。有大量嘅定律同算式需要記，不過大多數都可以用有趣嘅方法或者推導出來，不必死記。計數同思考如何簡化題目係必然，需要經常砌式，轉單位等。數學做Idendity做得勁嘅係呢科有多D優勢！練習都算性價比高，可以了解下過往點考各Topic，以及透過Marking Scheme知道如何有效地回答長問題，跳過廢話或者贅字，比你更Smooth嘅時間安排。
化學
中三學到嘅化學真係冰山一角，化學最多嘅係背各種化學物質嘅名、特性、係唔同化學反應下產生嘅物質、顏色等。對化學有興趣又Handle到記嘢嘅就可以一試！計Molar Mass或者轉單位都係重要課題，不過只要對單位敏感D就可以得心應手。練習都可以幫助你有效回答長問題，以及幫你記到各物質嘅特性。
生物
Bio要學嘅主要係理論，包括如何分類各種生物以及演化過程。要背細胞或者人體組織結構，以及相關嘅Process過程同細節。練習睇圖記字，因為好多題目都比幅圖你，叫你寫返個部位叫咩名。計數較少，主要係長問題居多。有興趣做Lab解剖都可以加深對部位嘅認知！
資訊及通訊科技
ICT對好多打開機，熟悉電腦嘅同學係一大福音，因為一部分嘅考核內容係User friendly嘅設計，考生只需從用家角度唸下例如網站點設計最方便使用，或者方便視、聽障使用，邏輯思考解決方法即可。當然，當中都要背好多硬件嘅功能同優缺點，以及多計數嘅部分，例如File Size、儲存一定數量需要嘅Bit數咁，但係識得用計數機就簡單得分，係穩答就有4、練得熟D就有5以上嘅執分科目。
講住呢度先，下次繼續講商科、語文科、歷史科同地理！記得中三選科只係個開始，只要揀到有興趣嘅科就點都有動力讀落去，要知道行行出狀元！
