Raymond sir: 如何溫習 Econ
一開頭先講重點：習慣唔好睇住書去做題目！
因為睇住書去做，唔會迫到自己去記嘢。點樣令自己記得深入？
其實同所有科目一樣（尤其理科，係呀慎防大家唔知，其實 Econ 唔係商科，而係理科，因為經濟學屬於社會科學，下次出文講吓）就係聽完書學完個 concept 之後直接做題目！因為我哋嘅目標唔係明咗 concepts 就算，而係要認知到題目點樣演繹啲 concepts，點樣拆題先最重要！
咁當然呢個時候又會有好多學生話：「咁我都未溫熟書/notes，唔識做住，當然唔會直接做啦！」呢個說法我教書咁耐實在聽得太多次，但我可以話你知呢個好多時只係偷懶籍口，因為只有你做錯過條題目，甚至同類嘅題目錯幾次，你先至會有深刻嘅印象。
當然，我哋作為補習導師，角色就係話你知咩方向去諗條題目，有啲咩方法可以套用喺大多數題目入面，令你做題目嘅效率提升，但我哋可以做嘅都只係指引，重點都係要你錯得多去記住個教訓，去記熟個套路。
至於針對 Econ 呢科，Paper 1 MC 係用嚟清 concepts
如果你熟練 MC 嘅答法，相信你 concepts 唔差得去邊。
但有好多 concepts 唔差嘅人成日話唔識點樣寫 Paper 2 長題目，其實自救嘅方法好簡單，就係抄熟30年 會考 + DSE Pastpaper 嘅 marking！冇錯，係抄！
唔需要自己花時間去完整咁諗點寫（除非你係中四五，仲有好多時間，否則一般嚟講中六都係抄就可以），因為只要你 concepts 唔弱，你望一次個 marking，你唔會唔知佢點解咁答，差在你自己寫唔出咁解，唔緊要，抄熟佢，熟到你記得個答題結構就夠。
(當然，如果你學校個老師係都要問啲好深好奇怪嘅問法，咁我祝你好運。不過你作為DSE 考生，奉勸你要以 DSE 嘅答題結構為本，多做 Pastpaper，少理亂嚟嘅學校老師）
溫習考試同學任何嘢一樣，要有實戰經驗，衰過，先至會成功。大家加油！
